Seinnipartinn í febrúar lá svo leiðin hvorki meira né minna en austur á Hérað.

Þangað höfðu Freyfaxamenn boðið okkur að koma af miklum myndarskap.  Lágu heldur ekki á liði sínu við að gera okkur dvölin þægilega.  Við gistum ásamt fleiri þátttakendum á Hótel Eiðum og ekki væsti um hrossin okkar í nýlegum hesthúsum sem hýsa nú mörg ungmenni og eru í eigu nokkurra vaskra hestamanna á Héraði.  Takk fyrir okkur!

Lá svo leiðin á ísinn.  Hann var í stuttu máli alveg frábær, náttúruleg umgjörð hin glæsilegasta og frábærar skráningar, um allt 120 skráningar í mörgum flokkum.  Fólk komið víða að, af Suðurlandi auk okkar Daníel Jónsson með hinn þekkta Þórodd, Vignir Siggeirsson og Lovísa úr Hemlu, Landeyjum, Þórður Þorgeirsson með fulltingi Hafliða (H-A-F-F-A) Halldórssonar svo ekki gleymist kvennagullið Fjölnir Þorgeirsson.  Að auki bæði góðir Skagfirðingar sem og Eyfirðingar.  Skemmtilegt mót sem er örugglega komið til með að vera.  Hófst svo keppnin.

Nú, það er skemmst frá því að segja að yngsti sproti fjölskyldunnar, Gústaf Ásgeir 11 ára, gerði sér lítið fyrir og sigraði 16 ára og yngri flokkinn með glæsibrag á geldingnum Knörr frá Syðra-Skörðugili.(spurning hver nefndi hann...)  Fékk 7 í einkunn og reið af miklu öryggi og gerði okkur foreldrana ákaflega stolta.  Svo nú var að standa sig!  Eftir forkeppni var ljóst að Hinni hafði tekið forystuna á hinum glæsilega Skúmi frá Neðri-Svertingsstöðum sem eigandinn, Einar Einarsson  lánaði honum nokkrum dögum áður.  Hulda var í fjórða sæti á nýja keppnishestinum sínum, Völsungi frá Reykjavík.  EFtir geysihörð og spennandi úrslit voru góð ráð dýr.  Hinni og Daníel jafnir!  Daníel neitaði að ríða bráðabana og samkvæmt öllum venjulegum hefðum og reglum hefði Hinni þar með átt að teljast sigurvegari.  Eitthvað voru menn ekki með reglurnar á hreinu á staðnum og vildu kasta upp á sætið sem Hinrik aftók með öllu.  Var þá ákveðið að þeir skyldu deila fyrsta sætinu en kastað yrði upp á verðlaunin, eiginlega undarlegt þegar haft er í huga að Daníel vildi ekki ríða umræddan bráðabana OG var neðar eftir forkeppni, og féllu verðlaunin þar með Daníel í skaut þar sem hann vann hlutkestið og þar með talinn hinn glæsti Lagarfljótsormur.  Dálítið klaufalega leyst mál sem enda fór svo að ýmsir fjölmiðlar túlkuðu sem svo að Daníel hefði sigrað mótið sem er alrangt, þeir voru jafnir í fyrsta sætinu.  Í þriðja sæti var svo heimamaðurinn og töltknapinn mikli Hans Kjerúlf, í því fjórða Þórður Þorgeirsson og Ás, því fimmta Vignir Siggeirsson og í því sjötta svo Hulda.

Skeiðið sigraði svo Þórður á Ás en Hinni lá bara seinni sprettinn á prýðilegum tíma á nýjum fimmgangshesti og vekringi, Óríon frá Lækjarbotnum.

Í alla staði skemmtileg ferð, veðrið á heimleiðinni yndislegt með frábærri fjalla og jöklasýn.  Takk fyrir okkur, Freyfaxamenn.

Og svo eru hér nokkrar myndir sem Axel Jón, hinn frábæri hestaljósmyndari, tók og leyfði okkur að nota.