Árið 1991 keypti vinur okkar, August Beyer, sem seinna kemur við sögu, sinn fyrsta alvöru gæðing, Pjakk frá Torfunesi.  Pjakkur sigraði B flokk fjórðungsmótisins 1991 eftirminnilega og var fasmikill yfirferðarhestur.  Þar reið Ragnar Ólafsson hestinum sem hafði þjálfað hann frá 1998.   Stefnan var strax sett á úrtöku en þar sem Ragnar var á leið til Bandaríkjanna gaf hann það frá sér.  Svo Hinrik tók það verkefni að sér.  Það er langt í frá auðvelt að taka við hesti á svona stundu en fyrsta prófraunin var Íslandsmót í hestaíþróttum í Húnaveri.  Þar urðu þeir félagar Íslandsmeistarar í tölti.  Þá var úrtaka sem Hinrik og Pjakkur sigruðu með glæsibrag og á HM í Svíþjóð voru þeir félagar efstir í tölti eftir forkeppnina en urðu að lúta í lægra haldi fyrir Tý frá Rappenhof, stóðhestinum fræga. 

Pjakkur er undan Feng frá Bringu.  Pjakkur fór svo til Augustar Beyer og var keppnis og reiðhestur hans til margra ára.  August og Pjakkur komust meðal annars í úrslit þýska meistaramótsins í tölti sem þóttu tíðindi í Þýskalandi, þar sem August er áhugamaður í hestamennsku.

Á fjórðungsmóti á Hellu reið Hinrik svo Hrefnu frá Gerðum í flokki eldri hryssna og var hún þar í verðlaunasæti, 5 sæti að mig minnir. 

Hulda reið Hrefnu svo á Íslandsmóti í Húnaveri, ekki komust þær stöllur í úrslit en þó var tekin þessi fallega töltmynd sem þau notuðu í lógó sitt sem þau létu gera ekki löngu seinna.  Annars keppti hún á Sindra sínum og gekk vel, m.a. á Fjórðungsmótinu í A flokki þar sem þau hlutu um það bil 8,30 og voru sátt við það.  Sindri var ekki þessi vinkilhágengi hestur að eðlisfari en með ástundun og góðri þjálfun rættist úr honum þar sem hann hafði ákaflega hreinar og taktgóðar gangtegundir.  Hann var frábær útreiðahestur og var jafnan rifist um það hver mætti ríða honum á ferðalögum.